O GO Agri-ROVENAT está a probar técnicas con ovellas e un robot para conservar a cuberta vexetal en oliveiras e viñedos.

• O Grupo Operativo, promovido pola Fundación Xeral do CSIC, levou a cabo un ensaio innovador en varias parcelas de vides e oliveiras autóctonas de Galicia co fin de optimizar a sustentabilidade.
• Este proxecto, cofinanciado pola Unión Europea e o Goberno de España, ten como obxectivo promover o emprendemento rural a través de cultivos agrícolas sostibles e rendibles, atraer e reter poboación, así como fomentar a renovación xeracional no campo.

O ensaio do Grupo Operativo AGRI-ROVENAT , promovido pola Fundación Xeral do CSIC , está a avanzar con éxito en varias parcelas de vides e oliveiras autóctonas situadas no concello de Quiroga (Lugo). O ensaio avalía como a introdución de ovellas adestradas para desenvolver aversión a estes cultivos contribúe a manter a biodiversidade e a cuberta vexetal natural. Tamén se probou un segundo método, o uso dunha segadora robótica con control remoto desenvolvida por Millasur . Ambos os sistemas axudan a preservar a cuberta vexetal das parcelas agrícolas á vez que evitan a erosión do solo, un problema común en zonas con pendente como a Ribeira Sacra, onde se está a levar a cabo este proxecto piloto en terreos pertencentes á empresa Ouro de Quiroga.

Carmen Martínez , directora do Grupo VIOR (Viticultura, Oliva e Rosa) da Misión Biolóxica de Galicia-CSIC , e tamén coordinadora científica deste proxecto, supervisou o desenvolvemento do ensaio e afirmou que "máis adiante compararanse as vantaxes e desvantaxes de cada un dos métodos empregados nas parcelas de oliveiras autóctonas de Galicia e na viña".

Tamén explicou que a aversión inducida específica aos oliveirais e ás viñas está deseñada para evitar que as ovellas se alimenten de plantas cultivadas e para garantir que consuman só a vexetación que cobre o chan. Este método cumpre con todos os estándares de benestar e saúde animal e foi desenvolvido, probado e publicado polo grupo Recerca des Remugants da Universidade Autónoma de Barcelona.

Ademais, está previsto un estudo sobre a calidade do leite producido por estas ovellas para estudar se o control da alimentación e o pastoreo en parcelas de oliveira e vide ten un impacto directo na súa composición e sabor.

Optimizar a sustentabilidade

Un dos principais obxectivos do proxecto é implementar e optimizar métodos de xestión de cultivos sostibles e respectuosos co medio ambiente que potencien a beleza da paisaxe da Ribeira Sacra e conserven a biodiversidade. Outro obxectivo é promover a recuperación das variedades de oliveira autóctonas de Galicia.

Estas propostas enmárcanse dentro de procesos de economía circular e pretenden ser eficaces e rendibles para os agricultores. Tamén buscan promover o lanzamento de novos proxectos de emprendemento sostible para contribuír á revitalización socioeconómica das zonas rurais mediante o aumento da produción de aceite de oliva gallego.

Ouro de Quiroga é un exemplo dunha peme impulsada por veciños da comarca da Ribeira Sacra que apostou por dar a coñecer os produtos locais e revivir as tradicións vinculadas á terra cun enfoque sostible que inclúe procesos de innovación pioneiros. Actualmente, cultivan dúas variedades de oliveira autóctonas gallegas: brava e mansa, que empregan para producir aceite de oliva virxe extra.

Membros do Grupo Operativo

O Grupo Operativo AGRI-ROVENAT, cofinanciado pola Unión Europea e o Ministerio de Agricultura, Pesca e Alimentación de España, está liderado pola Fundación Xeral do CSIC e impulsado polo grupo VIOR da Misión Biolóxica de Galicia (CSIC), que coordina os aspectos científicos e técnicos do proxecto. Outros participantes son o grupo Dairy Safe do Instituto de Produtos Lácteos de Asturias (CSIC), a Fundación Laboral de Santa Bárbara (FUSBA) e as empresas Ovejas y Corderos e Millasur. Aromas del Narcea e Ouro de Quiroga colaboran en varias fases do proxecto, coa coordinación administrativa por parte de artica+i e a xestión da comunicación por parte de Sánchez Pardo Comunicación. O custo total do Grupo Operativo Suprarrexional AGRI-ROVENAT é de 615.375,45 €. Foi subvencionado con 598.225,45 €, dos cales o 80 % (478.550,35 €) corresponde a fondos Feader.