Grupo Operativo: Uso integral da landra galega como estratexia de valorización e aproveitamento de frondosas autóctonas.

A creación deste Grupo Operativo ten como obxectivo aproveitar as oportunidades que ofrece a colleita de landras e valorar a idoneidade do seu posterior procesado, que favorecería a conservación e o desenvolvemento das especies Quercus robur e Quercus pyrenaica que se atopan en Galicia.

O estudo desta potencial alternativa podería dar lugar a unha ferramenta de xestión eficaz para a conservación e recuperación das carballeiras galegas.

As diferentes actuacións a realizar son:

• Avaliar o aproveitamento integral da landra galega como fonte económica de ingresos e complemento dos ingresos dunha explotación de agricultura ecolóxica.
• Concretar e validar os potenciais usos derivados da transformación das landras galegas en fariña, extractos vexetais, etc destinados a achegar materias primas innovadoras para a alimentación animal e humana (fariñas e extractos) e ingredientes innovadores para formulacións no sector cosmético, especialmente produtos naturais e ecolóxicos (estratos).
• Identificar os parámetros básicos da produción actual de landra nunha carballeira galega: avanzar cara unha silvicultura axeitada que incremente a produción e facilite o proceso de colleita; estimar os custos de produción de todo o proceso de colleita.
• Seleccionar os froitos máis produtivos das árbores para futuras plantacións de explotación comercial e para a mellora xenética das especies froiteiras.