A Rede Galega de Tecnoloxías Cuánticas lanza unha enquisa para identificar as necesidades do sector agroalimentario
Descrición
A Rede Galega de Tecnoloxías Cuánticas lanzou unha enquisa dirixida a empresas do sector agroalimentario co obxectivo de identificar as súas necesidades, barreiras e oportunidades relacionadas coa computación cuántica. Esta iniciativa enmárcase no compromiso da rede para impulsar o liderado de Galicia no campo das tecnoloxías cuánticas.
A iniciativa conta co apoio de DATAlife , o centro de innovación dixital especializado en biotecnoloxía, alimentación, saúde e medio ambiente, que participa activamente no desenvolvemento dun informe sobre as aplicacións da computación cuántica na alimentación. A participación das empresas é clave para garantir que o estudo reflicta unha visión representativa e conecte coas necesidades reais do tecido empresarial galego.
A Rede Galega de Tecnoloxías Cuánticas está formada pola Xunta de Galicia, as tres universidades do Sistema Universitario Galego (SUG), o CESGA, o Clúster TIC de Galicia, Gradiant, o Centro Cuántico Internacional de Fujitsu, o Centro de Tecnoloxías Fotónicas (Aephos) e os dous centros de innovación dixital de Galicia: DATAlife e DIHGIGAL.
A rede anima a todas as empresas interesadas do sector agroalimentario a completar o formulario de solicitude dispoñible , axudando así a configurar o futuro da computación cuántica aplicada a un dos sectores estratéxicos de Galicia.