Grupo Operativo NANOFERTILIZA: Avaliación do impacto da aplicación de nanomateriais no sector agrario

Os nanofertilizantes ensaiados non mostraron fitotoxicidade, sen que se observasen diferenzas na produción entre o seu uso e o doutros fertilizantes tradicionais. Os mellores resultados en produción e calidade dos cultivos obtivéronse con tratamentos combinados (nanofertilizante + NPK), conseguindo unha redución do 30% da dose habitual de fertilización mineral tradicional.

Estes resultados preliminares suporían un aforro no uso de fertilizantes minerais para os agricultores ao minimizar o risco de eutrofización por lixiviación, o que supón un importante beneficio ambiental para a protección do solo agrícola e das augas subterráneas. A aplicación destes materiais realizaríase cos mesmos equipos empregados para distribuír a fertilización tradicional (mediante aplicación foliar ou no solo). Na actualidade, o desenvolvemento comercial dos nanofertilizantes aínda é limitado no noso país, o que dificulta a súa adquisición. Serían necesarios estudos adicionais a nivel de parcela para cuantificar os beneficios tanto económicos como ambientais.