O proxecto SOST4VID instala paneis agrovoltaicos na adega As Laxas, dando un novo paso cara á viticultura sostible.
Descrición
O proxecto SOST4VID, liderado pola Asociación Agraria de Galega (ASAGA) en colaboración con SOLTEC Ingenieros, EVEGA, a Oficina de Innovación MEDRAR e as adegas As Laxas e Guímaro, alcanzou un novo fito coa instalación de paneis solares agrovoltaicos nos viñedos das Laxas (Arbo, Pontevedra).
Os paneis, instalados sobre as vides, permiten o paso da luz para os cultivos e están acompañados de sensores que monitorizan as condicións ambientais como a temperatura, o vento e as precipitacións. O obxectivo é avaliar o impacto desta tecnoloxía no cultivo, a produción e a eficiencia enerxética da adega.
Durante unha xornada informativa na adega, o consorcio compartiu os avances do proxecto, que se desenvolverá ata finais de 2026. SOST4VID forma parte das axudas á innovación de AGACAL e FEADER dentro do Plan Estratéxico da PAC 2023-2027, e busca ofrecer solucións replicables para mellorar a sustentabilidade e a rendibilidade dos viñedos, especialmente en zonas de viticultura heroica como a Ribeira Sacra.
Fonte: ASAGA