Curso en liña: Sanidade vexetal en cultivos hortícolas ecolóxicos
Descrición
O continuo crecemento da produción ecolóxica que se está a vivir tanto a nivel nacional como internacional, pon de manifesto o non tan afastado futuro da agricultura e da gandería.
Este crecemento tamén se ve reforzado pola maior conciencia ambiental que teñen os cidadáns e que, como consumidores, demandan produtos de calidade sen residuos químicos nocivos para a súa saúde.
A agroecoloxía promove o control natural das poboacións a través da xestión agronómica como a rotación de cultivos, o uso de emendas orgánicas, o aumento da biodiversidade cultivada e asociada...
Isto aumenta a complexidade do agrosistema, dándolle unha maior capacidade de autorregulación e, en consecuencia, unha redución da aparición de pragas e enfermidades nos cultivos. Por iso, é importante coñecer as diferentes formas de promover a presenza de organismos vivos afíns aos nosos cultivos que nos axuden a manter a súa boa saúde.
Estas prácticas agronómicas que respectan o medio ambiente e a saúde, favorecen a loita contra o cambio climático, a biodiversidade dos cultivos e, polo tanto, a conservación dos polinizadores.
OBXECTIVOS
– Analizar a importancia da sanidade vexetal na produción ecolóxica, dando a coñecer as estratexias para combater diferentes tipos de pragas e enfermidades.
– Informar da forma práctica de realizar controis e ver o estado sanitario dos cultivos.
– Utilizar mecanismos de control de pragas e enfermidades mediante biocontroladores.